హైదరాబాద్, జూలై 4: దక్షిణ మధ్య రైల్వే మరో రెండు అరుదైన జాతీయ అవార్డులు దక్కించుకుంది. విజయవాడ రైల్వే డివిజన్ పరిధిలోని రాయనపాడు వాగన్ వర్కుషాపు, సికిందరాబాద్ రైల్వే డివిజన్‌లో సూపర్‌వైజర్ల శిక్షణ కేంద్రానికి ఈ అవార్డులు లభించాయి. రాయలపాడు వర్కుషాపు జాతీయ స్థాయిలో గుర్తింపు పొంది బెస్ట్ వర్కుషాపు 2016-17 షీల్డ్‌ను కైవసం చేసుకుంది.

న్యూఢిల్లీ, జూలై 4: సహారా లైఫ్ ఇన్సూరెన్స్‌ను కొనేందుకు ఐసిఐసిఐ ప్రుడెన్షియల్ లైఫ్ ఆసక్తి కనబరుస్తోంది. సుబ్రతా రాయ్ నేతృత్వంలోని సహారా గ్రూప్‌నకు చెందిన ఈ సంస్థ పాలసీలు, ఆస్తుల విలువ 900 కోట్ల రూపాయలుగా ఉంది. అయితే బీమా రంగ రెగ్యులేటర్ ఐఆర్‌డిఎఐ.. గత నెల సహారా లైఫ్ ఇన్సూరెన్స్‌ను తమ అధీనంలోకి తీసుకుంది. నిబంధనలకు విరుద్ధంగా దాని తీరుందంటూ ఆక్షేపించినది తెలిసిందే.

న్యూఢిల్లీ, జూలై 4: బులియన్ మార్కెట్‌లో మంగళవారం వెండి ధర భారీగా పతనమైంది. ఈ ఒక్కరోజే కిలో ధర ఏకంగా 1,335 రూపాయలు క్షీణించింది. దీంతో 39 వేల స్థాయిని కోల్పోయి 38,265 వద్ద స్థిరపడింది. అటు బంగారం విలువ కూడా తగ్గింది. 99.9 స్వచ్ఛత కలిగిన 10 గ్రాముల పసిడి ధర 90 రూపాయలు దిగజారి 29,310 వద్ద నిలిచింది. అంతర్జాతీయ ప్రతికూల సంకేతాలే మార్కెట్ పతనానికి కారణమని బులియన్ ట్రేడర్లు విశే్లషిస్తున్నారు.

న్యూఢిల్లీ, జూలై 4: అనిల్ అంబానీ నేతృత్వంలోని రిలయన్స్ కమ్యూనికేషన్స్ (ఆర్‌కామ్).. ముకేశ్ అంబానీ నాయకత్వంలోని రిలయన్స్ జియో ఇన్ఫోకామ్‌పై మంగళవారం విరుచుకుపడింది. దేశీయ టెలికామ్ రంగం సంక్షోభంలో చిక్కుకోవడానికి జియోనే కారణమంటూ మండిపడింది. నిరుడు సెప్టెంబర్‌లో దేశీయ టెలికామ్ రంగంలో సంచలనం సృష్టిస్తూ 4జి సేవలను జియో ఆరంభించినది తెలిసిందే.