హైదరాబాద్, అక్టోబర్ 2: రాష్ట్ర రాజధాని హైదరాబాద్‌తో పాటు తెలంగాణలోని అనేక జిల్లాల్లో సోమవారం భారీ వర్షం కురిసింది. నైరుతీ రుతుపవనాలు తెలంగాణలో సోమవారం అనుకోకుండా బలంగా మారడంతో భారీ వర్షం కురిసింది. హైదరాబాద్, రంగారెడ్డి, వికారాబాద్, మేడ్చల్, మహబూబ్‌నగర్, వనపర్తి, నాగర్‌కర్నూలు, యాదాద్రి భువనగిరి, నల్లగొండ, మెదక్, వరంగల్ తదితర జిల్లాల్లో సోమవారం సాయంత్రం వర్షం దంచికొట్టింది.

విజయవాడ, అక్టోబర్ 2: రాష్ట్రంలో పేదలందరికీ ఇళ్లే లక్ష్యంగా ప్రభుత్వం పని చేస్తోందని ముఖ్యమంత్రి చంద్రబాబు నాయుడు స్పష్టం చేశారు. ఇళ్ల నిర్మాణంలో అవినీతి జరిగితే కఠిన చర్యలు తప్పవని హెచ్చరించారు. విజయవాడ వేదికగా సోమవారం రెండో సంవత్సర చంద్రన్న బీమా కార్యక్రమ ప్రారంభం, ఎన్టీఆర్ లక్ష గృహ ప్రవేశాల కార్యక్రమాల్లో ముఖ్యమంత్రి సిఎం ముఖ్య అతిథిగా పాల్గొన్నారు.

విశాఖపట్నం, అక్టోబర్ 2: ఒడిశా నుంచి రాయలసీమ, తెలంగాణ మీదుగా కర్ణాటక వరకూ ఉపరితల ద్రోణి కొనసాగుతోందని విశాఖ తుపాను హెచ్చరికల కేంద్రం సోమవారం రాత్రి తెలియచేసింది. దీని ప్రభావం వలన ఏపి, తెలంగాణల్లో విస్తారంగా వర్షాలు కురియనున్నాయి. ఒకటి, రెండు చోట్ల భారీ వర్షాలు కూడా కురిసే అవకాశం ఉందని తుపాను హెచ్చరికల కేంద్రం అధికారులు తెలియచేశారు.

శ్రీశైలం, అక్టోబర్ 1: శ్రీశైల మహాక్షేత్రంలో దసరా మహోత్సవాల్లో భాగంగా చివరి రోజైన శనివారం భ్రమరాంబిక అమ్మవారు నిజాలంకరణ రూపంలో, స్వామి అమ్మవార్లు నందివాహన సేవలో భక్తులకు దర్శనమిచ్చారు. తొలుత అలంకరణ మండపంలో స్వామి అమ్మవార్ల ఉత్సవ మూర్తులకు ఆలయ అర్చక వేదపండితులు ప్రత్యేక పూజలు నిర్వహించి ఆలయ ఉత్సవాన్ని ఎంతో వైభవంగా నిర్వహించారు.