హిందూపురం, జనవరి 22: సెంట్రల్ వర్శిటీకి విద్యార్థి రోహిత్ వేముల ఆత్మహత్య చేసుకున్న నేపధ్యంలో ఇంటెలిజెన్స్ వర్గాలు రంగంలోకి దిగాయి. రోహిత్ విద్యాభ్యాసం చేసిన పాఠశాలలు, కళాశాలలనుంచి పూర్తి వివరాలు సేకరిస్తున్నాయి. ఇందులో భాగంగా అనంతపురం జిల్లా హిందూపురం సమీపంలోని కొడిగెనహళ్లి ఆంధ్రప్రదేశ్ ప్రభుత్వ గురుకుల కళాశాలలో శుక్రవారం ఇంటెలిజెన్స్ వర్గాలు రోహిత్ వివరాలు సేకరించాయి.

విజయవాడ (క్రైం), జనవరి 22: కల్తీ మద్యం మరణాల కేసులో అరెస్టయి రిమాండులో ఉన్న కాంగ్రెస్ పార్టీ మాజీ ఎమ్మెల్యే, విజయవాడ నగర అధ్యక్షుడు మల్లాది విష్ణుకు బెయిల్ మంజూరైంది. అయితే బెయిల్ పత్రాలు సకాలంలో జిల్లా జైలుకు చేరనందున విష్ణు విడుదల శనివారానికి వాయిదా పడింది. దీంతో పెద్ద సంఖ్యలో జైలు వద్ద తరలివచ్చిన పార్టీ కార్యకర్తలకు నిరాశే ఎదురైంది.

హైదరాబాద్, జనవరి 22: దేశవ్యాప్తంగా రోహిత్ ఆత్మహత్య సంచలనం సృష్టిస్తున్న నేపథ్యంలో సెంట్రల్ వర్శిటీ కార్యనిర్వాహక సంఘం శుక్రవారం సమావేశమై పరిస్థితిని సమీక్షించింది. రోహిత్ కుటుంబానికి ఎనిమిది లక్షల రూపాయల పరిహారాన్ని ప్రకటించింది. అలాగే చర్చలకు రావలసిందిగా పరిపాలన బాధ్యతలనుంచి తప్పుకున్న అధ్యాపకులను ఆహ్వానించింది. అయితే వారు ఈ ప్రతిపాదనను తిరస్కరించారు.

హైదరాబాద్, జనవరి 22: ఆంధ్రప్రదేశ్‌లో వ్యవసాయ రంగాన్ని లాభసాటిగా మార్చేందుకు ముఖ్యమంత్రి చంద్రబాబునాయుడు చేస్తున్న కృషికి ప్రపంచ ఆర్థిక వేదిక మద్దతు తెలిపింది. వ్యవసాయ రంగంలో ఉత్తమ సాగు విధానాల అధ్యయనం, అమలుకు సహకారం అందించేందుకు ఆంధ్రప్రదేశ్‌తో కలిసి పని చేయాలని నిర్ణయించినట్లు స్పష్టం చేసింది. దావోస్ పర్యటనలో ఉన్న చంద్రబాబు ప్రపంచ ఆర్థిక వేదిక సదస్సులో పాల్గొన్నారు.