హైదరాబాద్, సెప్టెంబర్ 4: రాష్ట్రంలో భూముల రికార్డులు అయోమయంగా, గందరగోళంగా మారడంతో రాష్టవ్య్రాప్తంగా సమగ్ర భూ సర్వే చేపట్టాలని ప్రభుత్వం నిర్ణయించిన విషయం తెలిసిందే. స్వాతంత్రానికి పూర్వం ఎప్పుడో నిజాం హయాంలో భూముల సర్వే జరగడంతో భూ వివరాలు రెవిన్యూ రికార్డుల్లో ఒకలాగా, వ్యవసాయ రికార్డులలో మరొకలాగా ఉండటంతో వీటిని అప్‌డేట్ చేసి రికార్డులను ప్రక్షాళన చేయాలని ప్రభుత్వం సంకల్పించింది.

రాజమహేంద్రవరం, సెప్టెంబర్ 4: ఏలేరు రిజర్వాయర్ పరిధిలోని ఆయకట్టు ప్రస్తుత ఖరీఫ్‌కు సాగునీరు అందించేందుకు పురుషోత్తపట్నం ఎత్తిపోతల పథకం పాక్షికంగా సిద్ధమైంది. రోజుకు 700 క్యూసెక్కుల సాగునీరు అందించేందుకు పథకాన్ని సిద్ధం చేశారు. మొత్తం 98వేల ఎకరాల ఆయకట్టుకు సాగు నీరు లభించనుంది. అంటే, ఏలేరు ఆయకట్టుకు ఈ ఖరీఫ్ నుంచే స్థిరీకరణ లభించినట్టయింది.

అమరావతి, సెప్టెంబర్ 4: ఒక ఎన్నికతో అనేక ప్రశ్నలకు దీటైన జవాబిచ్చారని ప్రజలను టిడిపి అధినేత, సిఎం చంద్రబాబు అభినందించారు. గుంటూరు జిల్లా మంగళగిరిలో సోమవారం తెదేపా నాయకత్వ శిబిరంలో అధ్యక్షోపన్యాసం చేశారు. నంద్యాల, కాకినాడ ఎన్నికల ఫలితాల వల్ల ప్రజల్లో విశ్వాసం, పెట్టుబడిదారుల్లో నమ్మకం పెరిగిందని చెప్పారు. జాతీయంగా, అంతర్జాతీయంగా ఈ ఉప ఎన్నికలు రాష్ట్ర ప్రతిష్ఠను ఇనుమడింప చేశాయన్నారు.

ఖమ్మం, సెప్టెంబర్ 3: తెలంగాణ రాష్ట్రంలో భారతీయ జనతా పార్టీ అధికార టిఆర్‌ఎస్‌తో కలిసే ప్రసక్తే లేదని పార్టీ రాష్ట్ర అధ్యక్షుడు కె లక్ష్మణ్ స్పష్టం చేశారు. ఆదివారం ఖమ్మంలో ఆయన విలేఖరులతో మాట్లాడుతూ తెలంగాణ సంస్కృతిని, పోరాటాలను మజ్లిస్‌కు తాకట్టు పెడుతున్న కెసిఆర్‌కు ప్రజలు గుణపాఠం చెబుతారన్నారు.