ఖమ్మం, నవంబర్ 7: ఖమ్మం జిల్లా ఇల్లందు ప్రధాన రహదారిపై సోమవారం జరిగిన రోడ్డు ప్రమాదంలో ముగ్గురు మృతి చెందారు. ఇల్లందు నుండి తెల్లవారుఝామున 5గంటలకు ఖమ్మం బయలుదేరిన టాటా ఏస్ వాహనాన్ని కారేపల్లి క్రాస్‌రోడ్డు వద్ద లారీ ఢీకొంది. ఈ దుర్ఘటనలో టాటా ఏస్‌లో ప్రయాణిస్తున్న ముగ్గురు అక్కడిక్కడే మరణించగా మరో ఐదుగురికి గాయలయ్యాయి. టాటా ఏస్‌లో డ్రెవర్ సహా మొత్తం 14 మంది ప్రయాణిస్తున్నారు.

హైదరాబాద్, నవంబర్ 7: అగ్రిగోల్డు బాధితులను ఆదుకునేందుకు ఆ సంస్థకు ఉన్న ఆస్తులను అమ్మే బాధ్యతను ఎపి ప్రభుత్వం తీసుకోవాలని రాష్ట్ర హైకోర్టు సోమవారం నాడు ఆదేశించింది. విజయవాడ పరిసరాల్లోని ఏడు ఆస్తులను అమ్మాలని సూచించింది. జస్టిస్ వి రామసుబ్రమణియన్, జస్టిస్ ఎస్ వి భట్‌లతో కూడిన డివిజన్ బెంచ్ అగ్రి గోల్డు డిపాజిటర్సు ఏజెంట్స్ సంక్షేమ సంఘం దాఖలు చేసిన పిల్‌ను విచారించింది.

హైదరాబాద్, నవంబర్ 7: ఓటుకు నోటు కేసు విచారణను హైకోర్టు మంగళవారానికి వాయిదా వేసింది. వైకాపా ఎమ్మెల్యే ఆళ్ల రామకృష్ణారెడ్డి తరపు న్యాయవాది పొన్నవోలు సుధాకర్‌రెడ్డి సోమవారం నాడు కోర్టులో తన వాదనలు వినిపించారు.

తిరుపతి, నవంబర్ 7: పవిత్ర కార్తీక మాసంలో శ్రవణా నక్షత్రం రోజున తిరుమల శ్రీవారి ఆలయంలో ప్రతిఏటా నిర్వహించే పుష్పయాగ మహోత్సవం సోమవారం అంగరంగ వైభవంగా జరిగింది. సుగంధ సువాసనలు వెదజల్లే 12 రకాల పుష్పాలు, 6 రకాల పత్రాలతో శ్రీదేవి, భూదేవి సమేతుడైన శ్రీ మలయప్పస్వామికి వేడుకగా పుష్పార్చన నిర్వహించారు. రంగురంగుల పుష్పాలు, పత్రాల మధ్య స్వామి, అమ్మవార్ల వైభవం అద్భుతంగా సాగింది.