గ్రహాలు, సౌర కుటుంబాలు, నక్షత్ర మండలాలు
నెబ్యూలాలు కృష్ణబిలాలు
మనిషి మనసు విశ్వంతో లయమై
కళ్ళెం లేని గుర్రపు డెక్కల చప్పుడులో కలిసిపోయంది
కాలాన్ని పట్టుకునేందుకు విశ్వయత్నం చేసి
మహా విస్ఫోటనం వద్ద కాలాన్ని అధిరోహించాడు
ఏదో శక్తి
అదే గురుత్వాకర్షణ తరంగ శక్తి
ఆకర్షణ వికర్షణల వైరుధ్య శక్తి
సౌర కుటుంబాన్ని ఒకే కుటుంబంగా నిలబెడుతోంది

కవిత్వమనే పానకాన్ని
కొందరు పెగ్గుల్లో
కొందరు మగ్గుల్లో
వంచుకుని పంచుకుంటున్నారు
ఆసక్తిని పెంచుకుంటున్నారు

నాకు ప్రేమించటం తెలుసు
ప్రపంచీకరణ పరవశంలో కొట్టుకుపోతున్నవాన్ని కాదు
ప్రపంచీకరణ చెత్తలో అనామకున్ని కాలేదు
నేను నిటారుగా నిలబడే ఉన్నాను
జనం గుణం, జనం రణం, జనం దుఃఖం తెలిసినవాన్ని
నేనెలా ఆ వలయంలో చిక్కుకుంటాను?
నినే్నమిటో నేడేమిటో రేపేమిటో
శాస్ర్తీయ పూల చెట్టును పెంచుతున్నవాన్ని
సిద్ధాంతం మైలురాళ్లు దాటుతున్నవాన్ని

కవిత్వం నా లోపలి స్వరం
నన్ను నేను నిలుపుకోవాలనుకున్న చోట
చిరునామాగా ప్రకటించుకోవాలనుకున్న దగ్గర
కవిత్వమై ప్రవహిస్తూ పోతాను
కొన్ని దుఃఖ సమయాలు మరికొన్ని ఆనంద క్షణాలు
అన్నింటినీ కలిపి కవిత్వం చేస్తూ బతుకుతాను
మనిషిని ముట్టుకొని మమతల్ని
వెల్తురు గడపలో నిలబెట్టిన చోట
ప్రవహించే జ్ఞాపకం ఒకటి
కవిత్వమై కొత్త చిగుళ్ళు తొడుగుతుంది