క్షీరదమైన ఈ ‘స్కంక్స్’ మధ్య, ఉత్తర అమెరికాలో కన్పిస్తాయి. నలుపు, తెలుపు చారల బొచ్చుతో కన్పించే ఈ జీవులు రాబిస్‌ను వ్యాప్తి చేస్తాయి. మొక్కలు, కీటకాలను ఇష్టపడే వీటికి తేనెటీగలంటే చాలా ఇష్టం. అందుకే ఇవి ఒక్కోసారి తేనెపట్లపై దాడి చేస్తాయి. రెండునుంచి 15 అంగుళాల పరిమాణంలో ఉండే వీటికి భయం వేసినపుడు పృష్ట్భాగం శత్రువు ముఖంవైపు పెట్టి తోక ఎత్తి, కాళ్లతో నేలను తాకి భయపెడతాయి.

మన ఇళ్లలో కన్పించే బల్లులకు ఓ ప్రత్యేకత ఉంది. దాదాపు 3800 జాతులున్న ‘లిజార్డ్’ కుటుంబంలో అరవగల బల్లులు ఇవి మాత్రమే. ఎందుకంటే వీటికి మాత్రమే స్వరపేటిక ఉంది. తొండలు, పాముల్లా కన్పించే బల్లులు, ఊసరవెల్లులు, ఉడుములు, కొమెడాసహా లిజార్డ్ కుటుంబంలో ఉన్న మిగతా వేటికీ ఓకల్‌కార్డ్స్ లేవు. అందువల్ల అవి అరవలేవు. కేవలం శరీరభాష (బాడీ లాంగ్వేజ్) ద్వారా మాత్రమే అవి సమాచారాన్ని, సంకేతాలను ఇచ్చిపుచ్చుకుంటాయి.

అలనాటి రాజహంసల మాట కాదుగానీ..ఈనాటి హంసల(స్వాన్)కూ ఎన్నో ప్రత్యేకతలు ఉన్నాయి. నీళ్లలో ఈదేటపుడు అవి ఒంటికాలితోనే వెళతాయి. ఓ కాలును మడిచి వీపుపై పెట్టి ఈతకొడతాయి. మగహంసలకు పురుషాంగం ఉంటుంది. పక్షుల్లో ఈ ప్రత్యేకత వీటికే ఉంది. సాధారణంగా నేలపైకి వచ్చి ఆహారం తీసుకోవడానికి పెద్దగా ఇష్టపడవు. వీటికి కోపం ఎక్కువే. ప్రమాదం ఉందని తెలిస్తే...అవి ఎదురుదాడి చేస్తాయికూడా. ప్రతీ హంసకు కనీసం 25వేల ఈకలు ఉంటాయి.

ఎలుకలా కన్పిస్తున్నప్పటికీ ఆ జాతికి ఎటువంటి సంబంధం లేని ఈ ‘ట్రీ ష్రూ’ ఓ క్షీరదం. నీటిపై బుడగలు సృష్టిస్తూ వాటిపైనుంచి పరిగెట్టడం వీటి ప్రత్యేకత. వీటి పృష్ట్భాగంలో ఉండే గ్రంధులవల్ల అవి మరణించినప్పుడు ఓ రకమైన రసాయనం వెదజల్లబడుతుంది. వీటిని శత్రువులు చంపేసినా ఈ వాసన భరించలేక తినకుండా వెళ్లిపోతాయి. అన్నట్లు వీటి పళ్లలో విషం ఉంటుంది. ఆ విషం లాలాజలంలో కలిసి శత్రువుల ప్రాణాలు తీస్తుంది.