టాస్మేనియాలో మాత్రమే కనిపించే ఈ చేపలను ‘స్పాటెడ్ హ్యాండ్ ఫిష్’ అని పిలుస్తారు. శరీరంపై ఉండే మచ్చలు, సముద్రం అడుగుభాగాన నేలపై చేతులతో నడిచినట్లు అవి సంచరించడం వల్ల వాటికి ఆ పేరు వచ్చింది. మన వేలిముద్రల్లాగే ఈ చేపల్లో ఏ రెండింటికి మచ్చలు ఒకేలా ఉండవు. తమ జీవితకాలంలో చాలా అరుదుగా మాత్రమే ఈ చేపలు ఈదుతాయి. ఉదరభాగంలో ఉండే ‘్ఫన్స్’ను చేతుల్లా ఉపయోగించి అవి నేలపై నడుస్తూ ఆహారాన్ని అనే్వషిస్తాయి.

విభిన్నమైన రంగుల్లో ఆకర్షణీయంగా కనిపించే ‘ప్యారట్ ఫిష్’లకు ఎన్నో ప్రత్యేకతలు ఉన్నాయి. రాత్రిపూట శత్రువుల నుంచి రక్షణకు వీలుగా అవి ఒకరకమైన జిగట పదార్థంతో తమ శరీరం చుట్టూ ఒక కవచాన్ని ఏర్పాటు చేసుకుంటాయి. అంటే పారదర్శకంగా ఉండే ఓ బెలూన్ మధ్యలో అవి సురక్షితంగా ఉంటాయన్నమాట. ఒక మగ ప్యారట్ ఫిష్ కొన్ని ఆడచేపలతో కలసి జీవిస్తుంది.

సౌతాఫ్రికాలోని సబ్ సహారా ప్రాంతంలో కనిపించే ఈ క్షీరదం పేరు ‘ఆర్డావర్క్’. ఆఫ్రికాన్ భాషలో నేలపంది అని అర్థం. దీని మూతి పంది ముట్టెలా ఉంటుంది. చెవులు కుందేలును తలపిస్తాయి. తోక కంగారూలకు ఉన్నట్లే ఉంటుంది. అందుకే ఇది మూడు జంతువుల సమ్మేళనంగా చెబుతారు. నిజానికి వాటితో దీనికి ఎటువంటి సంబంధం ఉండదు. ఆహారం కోసం ఇది రోజుకు 5 కిలోమీటర్ల దూరమైనా తిరుగుతుంది. ఒక పూటకు 50వేల కీటకాలను ఆహారంగా తీసుకుంటుంది.

‘అఫిడ్స్’ అని పిలిచే ఈ కీటకాలు పంటలను అతివేగంగా నాశనం చేస్తాయి. ఆకులు, కాండాలపై వాలి రసాన్ని పీల్చి మొక్కలను నిర్వీర్యం చేస్తాయి. ఇవి రాత్రీపగలూ నిరంతరాయంగా ఈపని చేయడంవల్ల గంటల్లోనే పంట దెబ్బతింటుంది. అయితే ఇవి తనకు కావలసిన ఆహారాన్ని తినగా ఎక్కువైనదాన్ని విసర్జిస్తాయి. ఈ ద్రావకాన్ని ‘హనీడ్రాప్స్’గా పిలుస్తారు. చీమలకు ఈ పదార్థం అంటే ఇష్టం. అందుకే ‘అఫిడ్స్’ ఉండే చోట చీమలు ఎక్కువగా ఉంటాయి.